एन आर आई पिता पुत्र संवाद (२०९९)

पापाजी देखने छियैक अहाँ
गाछ चाउरक
कहूत' चाउर ऊपर फरैत छैक गुलाब जकां
की मांटीक तर मे
पापाजी आंगुर राखि ठोरपर
सोच मे परि गेला
की कहथिन बेटा के लाजे गरि गेला
तैओ साहस स' बजला
अच्छा पूछह दोसरो प्रश्न
सबहक जबाब देबह एके संग
ठीक छै कहूत'
गाय आ मंहिसमे की छै फरक
जखन दूनू छै दैत मिल्क आ काफ
केहन लगै छै गाछ मे फरल
जामुन आ आम
भुखले पेट कोना सुतै छै लोक
आ बाढीमे कोना भसिया जाइत छैक गामक गाम
कोन देश मे लोकक पैर मे बेमाय छै फाटैत
आ एखनो कोन लोक सब रद्द -दस्तस' छैक मरैत
सड़क पर जायब टॉयलेट देखि कतय नै छै सजा
आ कीचर भरल गाम मे केहन छै मजा
पापाजी कंप्यूटर पर लगेलनि गूगल सर्च
आ लगला ताकय जबाब
पुत्रके लगलै ख़राब
ओ बाजल-
कंप्यूटर पर त हमरो बुते जबाब भेटिए जेतै
जखन अहुं तकबई गूगले पर
तखन बाप भइएक' की हेतै ?.

ओबामा ओबामा ओबामा

ओबामा ओबामा ओबामा

हंगामा हगामा हंगामा

जीतल ओबामा हारल अछि मेकन

हारि गेल पालिन आ जीति गेल बैदन

अमेरिका त सहजे सुकराती नचइये

दुनियाक लोक सेहो फगुआ गबैये

गोरकिक ऊपर करिक्किक भाव बढ़ल

व्हाइट क अखारा मे ब्लैकक दाव लहल

उजरत इराक नै

फ़नकत इरान नै

डूबत ने बैंक कोनो एआईजी की लेहमन

दुनिया मे समताक डंका पिटायत

लादेन के गोरकास इरखा मिटायत

फुटत ने बम कतौ मरत ने लोक कतौ

सस्ते मे तेल आ सस्ते मे गैस भेटत

मरर के बेटा आब नैनो चलायत

सुकनी के देह मे एंजलिना फुलायत

चिबायब ने रोटी खायब आब कूकी

गंगा के बदला पेप्सीए मे नहायब

गेनमाक बेटीके चान पर पठायब

बुधना आब घोंघाके माला ने पहिरत

गीधना ने कहियो भैंसी चरायत

चंडे भाई किनि लेता जींस आ टी शर्ट

भौजी के परसुए हॉलीवुड घुमायब

थीर रहू धीर धरू मोन भरमाऊ नै

पानीए मे माछ अछि कुट्टी लुटाऊ नै

अब्दुल्ला कतेको बेर नाचल अछि

अनठिया बियाह मे

हरबरी मे खेयाली पुलाओ बरकाऊ नै

देखल छथि कार्टर

आ देखले छथि क्लिंटन

देखलहुं अछि बुश आ देखलहुं हुनकर फुस्स

ओबामा के दीया मे तेल कते राखल अछि

ता ओकरे अटकर लगाब त दीअ

ओबामा सनक हाथी परेखए त दीअ

खाइए कते आ बहैये कते

दुलकी चलैये की सरपट भगैये

सम्हारत पाकिस्तान की ढुकत इरान

कोरिया खेहारत की चीन परतारत

काबुल बचायत की पछारत ग रूस

की लेने देने परि रहत हरो पालो थुस्स